جیلوں میں ہفتہ رحمت اللعالمین منانے ، خالی آسامیوں پر مرحلہ وار بھرتی کا فیصلہ، وزیراعلیٰ عثمان بزدار نے منظوری دے دی

Sharing is caring!

لاہور (آن لائن)وزیراعلیٰ پنجاب سردار عثمان بزدارکی زیر صدارت وزیراعلیٰ آفس میں اعلیٰ سطح کا اجلاس منعقد ہوا جس میں جیل اصلاحات پر ہونے والی پیشرفت کا جائزہ لیا گیا۔ اجلاس میں وزیراعلیٰ عثمان بزدار نے جیلو ںمیں ہفتہ رحمت اللعالمینؐ منانے کے فیصلے کی منظوری دی۔ وزیراعلیٰ عثمان بزدار ہفتہ رحمت اللعالمینؐ کے موقع پر قیدیوں ا ور جیل حکام کیلئے پریزن پیکیج کااعلان کریںگے۔ اجلاس میں جیلوں میں خالی آسامیوں کو پر کرنے کیلئے مرحلہ وار بھرتی کی اجازت دینے کا اصولی فیصلہ کیا گیا۔

وزیراعلیٰ عثمان بزدار نے قیدیوں کیلئے کینٹین پر معیاری اشیاء مقررہ نرخ پر فراہم کرنے کے لئے فول پروف سسٹم وضع کرنے کاحکم دیا۔اجلاس میں قیدیوں کو تکیہ ، کمبل وغیر ہ گھر سے لانے کی ا جازت دینے کی تجویز پر اصولی ا تفاق کیا گیا۔ اجلاس کو بتایا گیا کہ وزیراعلیٰ عثمان بزدار کی ہدایت پر قیدیوں کی بیرکوں میں ڈش انٹینا/کیبل کی تنصیب کا کام شروع کر دیا گیا ہے۔ وزیراعلیٰ عثمان بزدار نے اجلاس سے خطاب کرتے ہوئے کہا کہ قیدیوں کے حقوق کا تحفظ یقینی بنایاجائے، ان کے استحصال کی ہر گز اجازت نہیں دیں گے۔

جیلوں میں کام کرنے والے قیدیوں کو مناسب معاوضے کی فراہمی یقینی بنائی جائے۔ انہوں نے ہدایت کی کہ قیدیوںکو علاج معالجے کی بہتر سہولتوں کیلئے جیل ہسپتالو ںمیں ڈاکٹروں، طبی عملے او رادویات کی کمی کو پورا کیا جائے اور ایمرجنسی کی صورت میں قیدیوں کو ہسپتال شفٹ کرنے کیلئے ایمبولینس سروس شروع کی جائے۔ وزیراعلیٰ نے کہا کہ پنجاب کی جیلوںکوشمسی توانائی پر منتقل کرنے کے پراجیکٹ پر کام کیا جائے۔ اجلاس میںایڈیشنل چیف سیکرٹری داخلہ، پرنسپل سیکرٹری وزیراعلیٰ،آئی جی جیل خانہ جات اور دیگر متعلقہ حکام نے شرکت کی